طار الكرى من رمش عيني ونشد
نشد ابيات(ن) بالمعاني حشيمـه
كانت حبيسه في ضميري تردد
ارهيت فيها للرسن والشكيمـه
قامت على كيفي تهيم وتجدد
مثايلا من خاطـري مستهيمـه
الله عسانا باطاعة الرب نسجد
في جنته في رغدها في نعيمه
دنياك هـذي تبنـي ابـراج وتهـد
عبـر وادروس للرجال الحكيمـه
يربـح بها من ينضـر اليوم للغـد
ولا كل واحد قاس نضره سليمه
والصبر بعض احيان لافاوت الحد
يصبـح لهيبـة نار تصلى جحيمـه
الصبر يالاجواد في ساعة الشد
فوز الغريـم اليا بلش في غريمـه
وكرامتك يالقـرم في مدة اليـد
وطيب النبا بين الرجال الحشيمه
والصدق والمعروف ومبادل الود
وحفض اللسان عن الزلل والنميمه
ودمح الخطا بين الرجاجيل يحمد
ولا تعاتب اللي مايقـدر خصيمـه
الاوله والثانيه جامل وصد
لاصار ماهـن من بلاوي عضيمـه
والثالثه لاتحرقك داخل السد
سـوق الثقيلـه للـرجال الفهيمـه
خل الغشيم وزايم النفس يركد
للحـق يبرك غصب ماهـوبشمـه
وان عاد عقب الطيب صكه على الخد
في موسمه حط الوسوم القديمه
مال الرزيل الا الرزاله إليا ضد
لا صار يجهل بالعلـوم الكريمـه
والكاسب اللي يحفض الجود ويرد
مايضيع فيه الطيب ضيعة بهيمـه
ولاكل طيرٍ تشبكه يحمل الهد
بعض الطيور تخيب فيه العزيمه
والرس مايروي مثل صافي العد
وبعض المراعي لوزهت لك وخيمـه
ومن يبذر الصبخه فلاضن يحصد
مثل النديم اللي خسر في نديمه
وصلاة ربي عد مـا طير غـرد
على الرسـول عداد ماهـل غيمـه
