الشاعر حمد الخمعلي باليوم الوطني 93 … السعودي من أهم الأحداث الوطنية
يُعتبر اليوم الوطني السعودي من أهم الأحداث الوطنية في المملكة العربية السعودية حيث يحتفل به في الـ 23 من سبتمبر من كل عام ويعكس هذا اليوم الفخر والوحدة الوطنية للشعب السعودي وتجسيدًا للإنجازات والتقدم الذي شهدته المملكة على مر السنوات وابدع الشاعر حمد الخمعلي بقصيده وطنيه بمناسبة هذا اليوم معبّرة عن مشاعر الإنسان السعودي في عرض إنجازات وطنه وأهمية هذا اليوم بالنسبة للمواطنين في المملكة العربية السعودية.
يتجدد هاجس الشعر عندي كل عام
يوم واحد يستثير القريحه كلها
لامتطى صفوة حروفي له افك اللجام
وندر حروف القصايد يبي يحتلها
في ميادين القصايد خذيت اعلى وسام
وصرت اماري فيهن اهل المنابر كلها
لاكن الاغلا والاجمل تجي وقت الزحام
يوم كلن يتعب امهار فكره دلها
كل شاعر وده يكون بالصف الامام
والاوايل عند اهلها ونا راعٍ لها
اتفاخر في قصيدي وصوغه بهتمام
ون دعيت اجزل حروفي تجي في حلها
اتنقى بالفرايد ويرفعها المقام
وللوطن تخضع جزال الحروف وجلها
كل بيتٍ بالوطن يعتلي فوق الغمام
القصايد ترتفع به ولا ينزلها
ارتقي بمجادها وافتخر بين الانام
وكلمة التوحيد نحيا ونموت بضلها
يكفي انك يابلادي بك البيت الحرام
وكل مسلم لاذنو للصلاه اقبل لها
في ذرا سلمان نسل الامام ابن الإمام
اللي بجيشه وخيله حماها كلها
يأمن الخايف بظله ويهناه المنام
والعداه تعيش وتموت زايد غلّها
لاسطى سيفه يكسر صليبات العظام
ومد كفه غيث كل الكبود يبلها
يوم جاره قال تكفى وحطه له حزام
دكهم في دارهم لين الاعدا ذلها
وفي يمنه شبل عُرّب خواله والعمام
حر نادر فعله وكل صعبه حلها
كلمته ماتشبه الا مضاريب الحسام
وضربته لوهي على اكبر جبال يهلها
ابتدا باهل الفساد ولجمهم بالنظام
وكل خاين كبل يديه حتى شلها
حط له رؤيه واسس قواعدها تمام
وكل فكره يبتكرها يبي ياصلها
التطور كنه يقول لك هيّا همام
انت من يقدر يقيس الامور بملّها
والله انا بك نماري ونفخر مانلام
يامحمد وانت سيف العروبه كلها
كل شعبك يفتخر فيك من بين الانام
ودونك رهاف المصاقيل غير نسلها
يفتخر شعري بك وبالوطن في كل عام
يتجدد هاجسي والحروف افلها
عاد هذا ايوم يفرق عن ايام العوام
يوم واحد يستثير القريحه كلها
